KERALA PRD News STATE GOVERNMENT

ജനസമ്പർക്കം’ ഓൺലൈനാക്കി സംസ്ഥാന സർക്കാർ; മുഖ്യമന്ത്രിയ്ക്ക് ഇനി എളുപ്പത്തിൽ പരാതി നൽകാം.

തിരുവനന്തപുരം:

മുഖ്യമന്ത്രിയുടെ ഓഫീസിന് പരാതി നല്‍കാനുള്ള നീണ്ട കാത്തിരിപ്പിന് വിരാമമിട്ട് പുതിയ സംവിധാനം. മുഖ്യമന്ത്രിയ്ക്കും അദ്ദേഹത്തിന്‍റെ ഓഫീസിനും ഓൺലൈനായി പരാതി സമര്‍പ്പിക്കാനുള്ള സംവിധാനമാണ് ഒരുങ്ങിയിട്ടുള്ളത്. www.cmo.kerala.gov.in എന്ന വെബ്സൈറ്റ് വഴി പരാതി നല്‍കാം.

പന്ത്രണ്ടായിരത്തോളം സര്‍ക്കാര്‍ ഓഫീസുകളെയാണ് മുഖ്യമന്ത്രിയുടെ ഓഫീസിനു നല്‍കുന്ന പരാതികള്‍ പരിഹരിക്കാനുള്ള പുതിയ സംവിധാനത്തിന്‍റെ ഭാഗമായി ബന്ധിപ്പിച്ചിട്ടുള്ളത്. അപേക്ഷ നല്‍കിയാലുടൻ ഇത് രജിസ്റ്റര്‍ ചെയ്യപ്പെട്ടതായി വ്യക്തമാക്കുന്ന അപേക്ഷാ നമ്പര്‍ ഉള്‍പ്പെടെയുള്ള വിവരങ്ങള്‍ മൊബൈൽ നമ്പറിലേയ്ക്ക് എസ്എംഎസ് ആയി ലഭിക്കും. ഈ നമ്പര്‍ ഉപയോഗിച്ച് അപേക്ഷയുടെ സ്റ്റാറ്റസ് ഉള്‍പ്പെടെയുള്ള വിവരങ്ങള്‍ അറിയാൻ സാധിക്കും.

പരാതികള്‍ പരിഹരിക്കാനായി നിലവിൽ 898 ദിവസം വരെയാണ് കാത്തിരിക്കേണ്ടി വരുന്നത്. എന്നാൽ ഓൺലൈൻ സംവിധാനത്തിന്‍റെ വരവോട സാധാരണ പരാതികള്‍ക്ക് 21 ദിവസത്തിനകം പരിഹാരമുണ്ടാക്കാൻ സാധിക്കുമെന്നാണ് പ്രതീക്ഷ. ദുരിതാശ്വാസ സഹായത്തിനായി നല്‍കുന്ന അപേക്ഷകള്‍ക്ക് 22 ദിവസത്തിനകം തീര്‍പ്പുണ്ടാക്കാൻ കഴിയുമെന്നും സര്‍ക്കാര്‍ പ്രതീക്ഷിക്കുന്നു.

വെബ്സൈറ്റിനു പുറമെ 0471 2517297 എന്ന ഫോൺ നമ്പറിലും 0471 155300 എന്ന ടോള്‍ ഫ്രീ നമ്പറിലും വിവരങ്ങളറിയാം. എൽഡിഎഫ് സര്‍ക്കാര്‍ അധികാരത്തിലേറിയതിനു ശേഷം 2,36,589 പരാതികള്‍ തീര്‍പ്പുണ്ടാക്കിയിട്ടുണ്ടെന്നും 70,953 പരാതികളിൽ നടപടികള്‍ തുടരുകയാണെന്നുമാണ് മുഖ്യമന്ത്രിയുടെ ഓഫീസ് വൃത്തങ്ങള്‍ പറയുന്നത്.

READ ALSO  മില്‍മ പാലിന് വില കൂട്ടാന്‍ തീരുമാനം : ഓണം കഴിഞ്ഞാൽ 4 രൂപ കൂടും

മുൻസര്‍ക്കാരിൻ്റെ കാലത്ത് മുഖ്യമന്ത്രിയായിരുന്ന ഉമ്മൻ ചാണ്ടി ജനസമ്പര്‍ക്ക പരിപാടിയിലൂടെ ആയിരക്കണക്കിന് ആളുകളിൽ നിന്ന് നേരിട്ട് പരാതികള്‍ സ്വീകരിച്ചിരുന്നു. പരിപാടിയ്ക്ക് ഐക്യരാഷ്ട്ര സഭയുടെ പബ്ലിക് സര്‍വീസസ് അവാര്‍ഡും ലഭിച്ചിരുന്നു. എന്നാൽ സ്വീകരിക്കപ്പെടുന്ന പരാതികളിൽ തീര്‍പ്പുണ്ടാക്കാൻ കാലതാമസമെടുക്കുന്നുവെന്നതും ഒരേ സമയം ഒട്ടേറെ പേരിൽ നിന്ന് പരാതികള്‍ സ്വീകരിക്കുമ്പോഴുള്ള അസൗകര്യങ്ങളും വിമര്‍ശനത്തിനിടയാക്കിയിരുന്നു.

Leave a Reply

Your email address will not be published. Required fields are marked *

%d bloggers like this: