തിരുവനന്തപുരം: വെഞ്ഞാറമ്മൂട്ടിൽ 200 കിലോ കഞ്ചാവുമായി ഒരാളെ തിരുവനന്തപുരം റൂറൽ ഡാൻസ് ടീം അറസ്റ്റ് ചെയ്തു. സംസ്ഥാനവ്യാപകമായി നടന്നുവരുന്ന നർക്കോട്ടിക് സ്പെഷ്യൽ ഡ്രൈവിന്റെ ഭാഗമായാണ് തിരുവനന്തപുരം റൂറൽ ഡാൻസാഫ് ടീം വെഞ്ഞാറമൂട് പോലീസുമായി ചേർന്ന് പരിശോധന നടത്തിയത്.
വെഞ്ഞാറമ്മൂട് തണ്ട്രാൻപൊയ്കയിൽ വാടകയ്ക്ക് താമസിക്കുന്ന തിരുവനന്തപുരം പൂവച്ചൽ കൊണ്ണിയൂർ ശങ്കരഭവനിൽ കിഷോറിനെയാണ് 200 കിലോ കഞ്ചാവുമായി പിടികൂടിയത്. തിരുവനതപുരം റൂറൽ ജില്ലാ പോലീസ് മേധാവി ദിവ്യ വി ഗോപിനാഥിന് ലഭിച്ച രഹസ്യവിവരത്തെ ത്തുടർന്ന് ഏറെ നാളത്തെ നിരീക്ഷണത്തിനുശേഷം ഇയാളെ പിടികൂടുകയായിരുന്നു.
തിരുവനന്തപുരം , കൊല്ലം ജില്ലകളിൽ ചില്ലറ വിൽപ്പനയ്ക്കായി കഞ്ചാവ് എത്തിച്ചിരുന്നത് ഇയാളുടെ നേതൃത്വത്തിൽ ഉള്ള സംഘമാണ്. ആന്ധ്രപ്രദേശ്, ഒറീസ എന്നിവിടങ്ങളിൽ നിന്നാണ് ഇയാൾ കഞ്ചാവ് നേരിട്ടെത്തിച്ച് രഹസ്യ ഗോഡൗണുകളിൽ സൂക്ഷിച്ചിരുന്നത് . കഴിഞ്ഞ ആറുമാസമായി ഇയാൾ ഡാൻസാഫ് ടീമിന്റെ രഹസ്യനിരീക്ഷണത്തിൽ ആയിരുന്നു.
നർക്കോട്ടിക് സെൽ ഡിവൈ.എസ്.പി വി.റ്റി രാസിത്ത്, ആറ്റിങ്ങൽ ഡി.വൈ.എസ്.പി സുനീഷ് ബാബു എന്നിവരുടെ നേതൃത്വത്തിൽ വെഞ്ഞാറമ്മൂട് പോലീസ് ഇൻസ്പെക്ടർ വി.സൈജുനാഥ്, സബ് ഇൻസ്പെക്ടർ വി.എസ്സ്.വിനീഷ്, ഡാൻസാഫ് അസ്സിസ്റ്റന്റ് സബ് ഇൻസ്പെക്ടർ ബി.ദിലീപ്, സി.പി.ഒ മാരായ സുനിൽരാജ് , ഷിജു, വിനീഷ് എന്നിവരുടെ നേതൃത്വത്തിലുള്ള സംഘമാണ് അറസ്റ്റിന് നേതൃത്വം നൽകിയത്.
